Hannde 28 siilto (sutambar), Forces Vives (ɗum ko lunndaare nden, senndikaaji ɗin, soosiyete siwil on) nodduno seppo moolanaango ka dinngiral (estaadi) fii anndingol salaare maɓɓe kanndidaayaagal Kapiten Muusaa Dadis Camara ngal.

Fii kala sentere jaɓtunde laamu nden haɗiino kala seppo, Forces Vives’en fiɓuno annuyee laatingol seppo ngon. Ko ɗum waɗi gila bimmbi, yahdiiɓe lunndaare nden dunyi baafe naatirɗe dinngiral ngal, e hoore tiindagol miniteeriiɓe ɓen e Berets Rouges’en, ɓe ko sentere suɓaande fii danndugol hooreejo leydi on, hiɓe anndiraa yaawude huɓɓude yiite e jamaa on. Wano fewndo fitinaaji 2006 e 2007 ɗin, Berets Rouges’en hollii hiiɗeede maɓɓe tinndiraande nden. Ko ɓuri kon e waraaɓe ɓen ko e juuɗe nden sentere okkaande kaɓirɗe ɓurɗe moƴƴude ɗen ɓurnde konu woowaangu ngun njoɓdi. Jamaa on kadi wi’aama lancii komisaariya poliisi. Limoore maayeele ɗen no ɓurtude tun teddude waktu kala waktu. Tippude e kabaaru AFP, fureeji yimɓe 60 no ka suudu maayɓe ka laamorde Konaakiri.

Hooreeɓe mawɓe ɗiɗo e lunndaare nden, Sellu Dalen Jallo e Sidiyaa Tuuree no tawaa e barmuɓe ɓen. Siimtaama wonde ɓe nanngaama ɓe naɓaama e daakorde miniteeri. Haa jooni anndaaka no ɓe fewndori. Tippude e oogirɗe kabaaruuji go’o, koninkooɓe yanii e galle Sellu Dalen Jallo ɗen bonnii ko heewi. Jiwɓe kadi hippaama, e bi’ol seedeeɓe.

Waɗɗiinde warngo ngon e ndee nyalaande ɓaleere no fawii e ɓee limtaaɓe ɗoo: Kapiten Muusaa Dadii Kamaraa, hooreejo sentere nden noddituɗo hoore mum persidan ndenndaandi ndin, Kapiten Ceegboro Kamaraa, halfinaaɗo haɓo ngeeygu doroogu e banndiyaagal mawngal ngal, Jeneral Seekubaa Konaatee jaagorɗo ndeenaagu leydi ndin, Jean-Claude Piwii jaagorɗo kisal hooreejo leydi on. E ngol ɗoo laawol kadi, Dental Leyɗeele Afirik ngal e CEDEAO on e leyɗe janane ɓureteeɗe huuwondireede ɗen hollii jaasere maɓɓe nden saanga nde ofisiyeejo haalori laamu e hoore rufugol ƴiiƴam heewɗam.